一分鐘台語好上台

石頭佮雞卵

後山人 — Tue, 25 Nov 2025 14:23:41 GMT

石頭佮雞卵
電影《辯護人》內底有一段話：別人笑阮是提雞卵磕石頭；石頭是死的，雞卵是活的。石頭𠕇硞硞親像現實生活中無理的體制佮困境，看起來真粗勇，毋過伊無生命。雞卵雖罔看起來軟汫、毋過內底有性命、有向望，有可能孵出來的雞仔囝，總有一工跳上石頭，贏過石頭。
這个比喻，就親像咱老師佇教育現場的處境。有時體制限制、環境困難，看起來親像石頭；毋過，咱的信念、咱對學生的疼惜，就是彼粒雞卵──有可能看起來軟汫，毋過充滿性命力。咱若願意堅持、願意相信向望，教育的力量就會破殼而出，展現希望。
「石頭是死的，雞卵是性命是希望」，提醒咱老師仁：真正有力量的，是性命，是愛，是希望。老師若有信念，囡仔就有機會超脫一切困境，迎向光明。
--
Hosting provided by SoundOn

林仔邊烏珍珠

後山人 — Tue, 25 Nov 2025 14:19:23 GMT

林仔邊烏珍珠
水是植物的生命。若是無水，樹仔無法度生葉，花蕊無法度開，當然嘛無法度結子收成。天無雨，人無步，若是無水，作穡人閣較拍拚嘛無效。
毋過，若是用海水來淹就親像貓食鹽存範死的，海水的鹽分會破海塗肉樹根會死。對植物來講海水親像是毒藥。
屏東林邊因為魚塭仔抽地下水，海水倒灌入去蓮霧園，樹欉有危機意識顛到生出甜份閣較懸的烏珍珠。危機是學習的機會，是變閣較好的樓梯。
--
Hosting provided by SoundOn

少年英雄

後山人 — Tue, 25 Nov 2025 14:14:16 GMT

少年英雄
民間信仰，保護地方的五營：東、西、南、北佮中營。五營統領就是中壇元帥李哪吒。伊是囡仔神，腳踏風火輪，手攑混天綾，勇氣滿滿，降妖伏魔，是「少年英雄」。
聖經內底嘛有撒母耳。伊細漢的時就聽會著上帝喊伊的聲，替信徒服務，傳經說道，信心堅定。
無論啥物信仰，攏有一款相通的心念——少年人主心定願意行動，就有上大的力量。
現代嘛有少年英雄。美國的凱撒玲（Katherine Komenda），看著非洲囡仔染著ma-lá-lí-á真痛苦，用行動募款買蠓罩來救真濟性命。
這个世界需要少年有夢，閣較需要大人的信任佮協助。若有老師、家長願意信任用行動支持做𪜶的翼股，囡仔就會飛閣較懸，閣較遠。
--
Hosting provided by SoundOn

第三十二篇五肢手指頭仔

後山人 — Mon, 20 Oct 2025 12:19:10 GMT

五肢指頭仔
有一工，五肢手指頭仔咧相諍，逐家攏展家己的本等講家己上𠢕，上應該做頭。
大頭姆講：「我粗勇，徛頭，干焦我會當印手模代表主人。一下比出來，人人喝讚，恁逐家應該聽我的。」
指指趕緊搶咧講：「我伶俐頭殼好甲，共人指路、點拄，欲食啥物好料的嘛攏愛靠我，當然是愛我來𤆬頭！」
中指面凊凊「哼」一聲：「恁小看一下。我人懸漢大，徛遮—正中央，這叫啥？『c位』、『大咖』，氣勢十足，我百面是上蓋威風的老大的！」
自來上優雅的尾二指實在聽袂落去矣，隨講：「世間上，上蓋大的力量就是「愛」，愛的誓言佮約束干焦我擔當會起，訂婚的手指就是掛佇我身上，做主官嘛是拄好爾。」
這時尾指細細聲講：「恁攏有足厲害的才調，足特別的所在，毋過乎~雙手合十欲拜佛、下願的時我是上蓋貼心，上蓋倚近佛祖的，敢毋是~」
猶袂爭煞，主人向腰𢯾一粒規百斤的大石頭，雙手十肢指頭仔做伙出力，舞甲烏趖趖，忝甲喘怦怦，真無簡單才𢯾振動，完成空課。逐家那歇喘那講：好哉在，有逐家鬥分擔，無，這聲就真漏氣矣，咱毋但愛對家己有自信過日，嘛愛會曉互相團結合作做代誌。免閣相爭siánn來做老大的。
五肢手指頭仔的故事提醒咱一件代誌：世界上無一定啥人較大，較重要，若會仝心，氣力就大；若無合作，就無大成就。咱若會互相疼惜，互相尊重，心胸就愈來愈開闊，代誌嘛會愈做愈好。
--
Hosting provided by SoundOn

第三十一篇會跋才會大，免驚跋，免驚痛

後山人 — Wed, 08 Oct 2025 14:48:28 GMT

會跋才會大，免驚跋，免驚痛
逐家攏無佮意「痛」的感覺，
猶毋過痛是保護人性命重要的信號。
1999年，美國有一个跳la̍k-kak-suànn的運動員（Joan Murray）。
一日，伊對四千五百公尺懸的天頂跳落的時，
主傘拍袂開，備用傘嘛出問題。
就直直墜落，離地面賰兩百公尺的時，備用傘才勉強開一息仔，
落尾規个人挵落地面，碰一聲，心臟tsuann定去。
身軀栽落去一个紅火蟻岫。規陣紅火蟻氣刜刜，拚性命共咬兩百外下！
紅火蟻的毒刺咬落真痛，引起腎上腺sīn-siōng-suànn素反應予心臟有氣力閣跳有通檔甲人來救。伊昏迷兩禮拜，手術二十擺，落尾閣活起來。兩年後，她閣再轉去比賽場。咱上蓋驚惶的「痛」代表性命力，代表希望。
紅火蟻是敵人嘛是救命恩人。會跋才會大，免驚跋，免驚痛。
--
Hosting provided by SoundOn

第三十篇大自然是上讚的老師

後山人 — Wed, 08 Oct 2025 14:00:12 GMT

囡仔佇大自然的環境生活是上好的學習，看山看水，看花草樹木，看蟲仔、鳥仔，囡仔的目睭會愈看愈真，心胸嘛會愈開愈闊。專心看狗蟻慢慢仔搬食物，看露螺寬寬仔爬就是上蓋鮮沢的課本。
大人陪伴囡仔教𪜶疼惜生命，會曉尊重萬物。風聲、鳥語，水流攏是大自然的音樂，予囡仔感受、享受生活。
大自然是上讚的老師，予囡仔學會曉觀察、體會、感恩。性命攏是互相倚靠。若咱大人願意逐工撥一寡時間，陪伴𪜶去看、去聽、去感受，囡仔就學會曉一件上珍貴的代誌——愛土地、疼萬物，成做一个知足閣有感情的人。
--
Hosting provided by SoundOn

第二十九篇愛是出發的所在

後山人 — Mon, 29 Sep 2025 13:33:30 GMT

「愛是出發的所在」——徐超斌
2025年9月23一場風颱造成馬太鞍溪崩山湖，親像規个大水庫的塗石流一下衝入光復鄉，連牛牢內的奶牛嘛予沖甲遨遨輾，有十外外人失去性命，有人失蹤。街仔路、厝宅內底一四界攏予塗沙淹密密，若是閣拄著大雨更加危險，泡水的糞埽會生蟲散佈細菌，發出臭味。
真濟志工穿靴管紮沙挑自全台灣各縣市來鬥相共，9/27~29三工連假有人甘願去做苦工，日頭跤，含水的塗沙重槌槌，焦水的挖袂振動，一工清出超過六千噸的塗沙，三千噸的糞埽見證臺灣人將心比心，互相幫助的愛心。
毋但佇災區，臺灣各地攏受著正面的影響，逐家耐性加倍，嘛閣較大方鬥相共，今仔日我坐火車轉來中壢，機車去予雙爿的機車夾牢咧，舞半晡拄好有一个先生來停車，隨替我喬開，一个小姐鬥扞真緊就牽好勢。
我知，佇有愛心的臺灣好徛起，有困難的時袂孤單。
班級經營上蓋讚的就是予囡仔願意為班級付出，感受予人接納，有失覺察的時互相提醒，互相體諒，有困難的時有人相伨做伙面對，親像是一傢伙仔仝款，感覺有安全感。
--
Hosting provided by SoundOn

第二十八篇刣龍的技術

後山人 — Mon, 29 Sep 2025 13:31:45 GMT

刣龍的技術
一个少年家立志欲學一項別人無的技術，提規个傢伙去拜師學藝，用三年的時間綿綿精精咧學習，終其尾掌握刣龍的刀路佮鋩角。猶毋過世間根本就揣無龍的影跡，伊學的技術完全無利用的機會，伊嘛無法度了解家己學的效果按怎，心內感覺愈來愈憢疑佮失落。
教育愛強調素養：學習面對現實生活佮未來挑戰的能力，佇生活情境當中會當運用。老師若是無考慮學習的運用干焦想欲教學生閣較厲害閣較稀罕的智識，就失去學習的價值。
行棋有棋步，刣豬有刀路，老師就是愛思考啥物是學生需要學的能力，毋通癢的毋扒，痛的扒甲流血，無彩寶貴的時間閣資源。
--
Hosting provided by SoundOn

第二十七篇胡蠅王Lord of the Flies

後山人 — Fri, 22 Aug 2025 13:01:07 GMT

《胡蠅王Lord of the Flies》是一部小說，故事是一群囡仔意外流浪到無人的島嶼了後，欠缺大人的教養。拄開始𪜶建立一寡簡單的規則，比論用海螺集合，有人𤆬頭做伙揣食通生存，起火引船隻來解救…毋過漸漸因為爭權奪利、互相無信任佮驚惶開始有愈來愈濟衝突。
無社會規則佮法律的維持者，人性自私烏暗的本性予提著權力的人愈來愈殘忍酷刑，愈來愈離經，最後這陣6歲到12歲的囡仔失去理性甚至刣死對方，見證人心是上蓋恐怖的怪物，島上雖罔有真濟資源，煞因為野蠻佮自私變做互相屠殺之地，親像Lord of the Flies胡蠅王冊名譬相腌臢A-tsa的人性。
教育、法律佮社會規則是人佮人和平鬥陣上重要的素養。教育毋但是傳教智識，嘛是𤆬領學生按怎對人公平、尊重佮互相合作。社會規則毋是限制是保障每一个人的權力佮自由，避免人性中衝碰佮自私去害著眾人。
咱愛重視教育，予社會愈來愈進步，愈來愈文明，才有機會發揮人性上蓋良善的一面。
--
Hosting provided by SoundOn

第二十六篇提夜明珠拍鳥

後山人 — Thu, 14 Aug 2025 12:43:35 GMT

隨侯珠就是靈蛇之珠，傳說是隨國君王解救一隻著傷的蛇，蛇真實的身分是龍王之子，伊提靈蛇之珠報答救命之恩，隨侯珠是非常稀罕閣珍貴的寶貝。
有一个拍鳥的人得著隨侯珠，一擺看著天頂一隻厝鳥仔飛懸懸，就順手將隨侯珠當做石頭向厝鳥仔共擗出去。眾tsìng人恥笑伊是盼仔，會曉算袂曉除，糶thiò米換番薯。
現代爸母嘛定定用親子寶貴的時間，囡仔快樂的生活無閒咧補遮補遐。
--
Hosting provided by SoundOn

第二十五篇河伯看海(望洋興嘆)

後山人 — Tue, 12 Aug 2025 12:57:02 GMT

風颱來，雨水親像對天頂一桶一桶倒落來，山頂塗水大大港流落溪流，幾百條的溪流向黃河，塗水親像千軍萬馬將幾若尺粗的樹箍搧甲遨遨輾，大粒石頭予水流甲lok lok的聲又閣急又閣響，溪河中幾若十甲闊的沙埔一下就沖散去，連幾若噸重的岩石嘛予水趕甲無看影，河面漲闊幾十里遠，對河邊看對對岸茫茫渺渺分袂清楚岸頂是牛抑是馬。
河伯非常奢颺：這款壯觀的景緻實在了不起，我的腹腸會容得天下所有所有的水啊！我欲沿路來去欣賞，來去接受世間萬物崇拜。
伊順水流向東愈看愈得意，河水最後流入北海，看對遠遠去無邊無盡的海親像佮天相敆根本看無水的盡尾。
河伯愣去，紲落見笑對大海講：「大鼎未滾細鼎沖沖滾，有影是天外有天」
--
Hosting provided by SoundOn

第二十四篇無用之用

後山人 — Sat, 09 Aug 2025 05:52:50 GMT

莊子佮學生行入山欲揣朋友，看著一个剉樹的行過溪邊一欉懸大的樹仔，葉仔茂茂茂。莊子問伊：這欉樹仔樹箍遮粗，樹身遮懸，是按怎你無欲剉咧？
剉樹的向大樹瞭一下：無啥奇怪啦！這款樹木無路用：做船會沉；做棺材快爛；做家私器具隨漚，做柱仔厚蛀龜，就是無半項會做得，無人愛用，所致有通佇這溪仔墘活幾若千年。
來到朋友兜，主人隨叫人刣鵝欲相請，閣吩咐下跤手人：著刣彼隻袂曉叫的喔，彼隻會叫的愛留咧顧厝。
學生憢疑問莊子：樹無用處活幾千年，鵝無用處煞快死，這有啥物標準咧？
有用處抑是無用處是無一定的標準，順其自然，毋通有淡薄仔能力就傷過頭奢颺，做人就是愛堅持培養家己的能力。
--
Hosting provided by SoundOn

第二十三篇鵷雛uan-tshu搶死鳥鼠？

後山人 — Tue, 05 Aug 2025 05:36:29 GMT

鵷雛uan-tshu搶死鳥鼠？
莊子心適性想欲去拜訪好朋友惠施，惠施彼時是梁國宰相。
有人就共伊搧大耳：莊子來梁國敢會是欲來搶你的相位。
惠施心內想：我真無簡單才有今仔日的官位，這箍莊子名聲透京城，伊若來梁國恐驚有伊就無我囉！
隨派人揣三暝三日欲共擋。
哪知莊子猶是出現佇相府對惠施講：“你有聽過鵷雛這款巨鳥無？伊展翅一飛就從南海飛到北海，心性非常尊貴。有一隻貓頭鳥當咧食生蟲的死鳥鼠，拄好聽著鵷雛擛翼的聲，隨規身霸牢死鳥鼠驚人搶。莊子那講那繩tsîn惠施：啊，大人你敢是咧驚我搶咧？”
人各有志，名佮利有人看做是好寶；有人看做是生蟲的死鳥鼠。
--
Hosting provided by SoundOn

第二十二篇自由之龜

後山人 — Sun, 03 Aug 2025 11:50:51 GMT

自由之龜
楚王想欲倩莊子入宮講道，兩位使者看見當咧釣魚的莊子。
吾王久聞先生賢名，相欲請先生入宮參詳國家大事。向望先生答應為大王分憂，為百姓謀利。
莊子講：我聽講楚國有一隻神龜活到三千歲，當咧泅水的時予人撈起來刣死。王將龜殼好禮仔舒tshu 綾羅綢緞lîng-lô-tiû-tuān 保藏佇雕刻花血的箱仔，閣供kìng佇廟堂之上。請問兩位大人：這龜較愛死後留殼予人敬拜，抑是較愛活咧佇塗水內底拍翸咧？
使者回講：當然是愛自由活咧佇塗水內。
莊子講：大人請回！我嘛較愛自由拍翸啦。
名佮利的代價定定攏是用自由、健康、親情甚至是性命換來的。
--
Hosting provided by SoundOn

第二十一篇知魚是快樂的

後山人 — Sun, 03 Aug 2025 11:46:58 GMT

知魚是快樂的
莊子和惠子徛佇橋頂遊賞。
莊子喃：佇水裡逍遙自在，這是魚的「快樂」呀！”
惠子ge：「你」毋是「魚」，哪會知啥物是魚的「快樂」？
莊子辯：「你」毋是「我」，哪會知我毋知魚的快樂呢？
惠子扴：嘿啊「我」毋是「你」，當然毋知你到底知抑是毋知。
「你」嘛毋是「魚」，按呢你穩當毋知魚的「快樂」啦！
莊子歡喜講：你一開喙就問我這句：哪會知啥物是魚的「快樂」？
明明你就知我知啊。
這个公案親像是咧辯話骨，毋過無仝的經歷造成人的想法佮感受嘛無相𫝛，咱毋通輕易講三，講四評價別人。
--
Hosting provided by SoundOn

第二十篇莊周變蝴蝶蝴蝶

後山人 — Sun, 03 Aug 2025 11:44:08 GMT

莊周變蝴蝶
莊周眠夢著家己變做一隻蝴蝶，佇一片花海自由自在咧飛來飛去，跳來跳去欶花蜜，鼻花芳實在有夠舒爽快活，伊完全忘記得家己是一个「人」。當當雄雄醒過來，真驚惶，起憢疑：我這身「人」的身軀敢會是一隻蝴蝶變來的？到底是莊周眠夢變做蝴蝶？抑是蝴蝶眠夢變做莊周這个人咧？
一世人自生到死親像一場夢？莊子借眠夢將真實佮迷幻的界線拍破，到底夢裡是真？抑是現實才是真咧？
--
Hosting provided by SoundOn

第十九篇魯王飼鳥

後山人 — Sun, 03 Aug 2025 11:35:18 GMT

魯王飼鳥
有一工，皇宮飛來一隻海鳥。是佇魯國毋捌看過的，毛彩顯目媠氣。
魯王講：緊共掠落來，這隻鳥仔真稀罕一定是神鳥，我欲共好好仔款待。
魯王真疼惜神鳥，逐工親身飼伊食山珍海味，閣吩咐樂團演奏上優雅的樂曲予伊聽。
鳥仔心驚膽嚇一點仔都無法度體會魯王的好意：一塊肉嘛食袂落，一滴水嘛無入喉，三工後就活活枵死囉。
魯王用家己享受的生活來飼鳥，毋是用鳥仔欲愛的方式來對待。
千萬毋通勉強別人接受家己的方式，尊重才有可能予人歡喜接受心意。
--
Hosting provided by SoundOn

第十八篇大樹欉佮菅芒仔

後山人 — Sun, 03 Aug 2025 11:29:13 GMT

大樹欉佮菅芒仔
風颱天了後，大樹欉袂勘得狂風煞斷做兩橛kue̍h倒翹翹。邊仔細粒子、看著真軟汫的菅芒仔顛倒一屑仔就無顫悶著。
大樹欉問菅芒仔：我生做高長大漢，肢骨粗勇閣𠕇篤猶是予風雨損蕩甲悽慘落魄跤殘手斷，是按怎你遮有牽挽咧？
菅芒仔講：「透風的時你人懸漢大硬拄硬搢風總是難免有輸贏，有損傷，我知影家己軟弱，透風落雨的時就落軟向頭彎身讓路，無愛佮人比懸低。
做人處事用智慧，親像菅芒仔：你讓人有步，就是予家己有路。
--
Hosting provided by SoundOn

第十七篇落落井的狐狸佮羊犅

後山人 — Sun, 03 Aug 2025 11:26:15 GMT

落落井的狐狸佮羊犅
一日狐狸落落去深深深的古井裡。當咧懊惱的時有一隻羊犅來到井邊。
狐狸大聲呵咾：這井水清甜冰涼，啉著真爽快！我不三時就愛落來享受一下。
喙焦甲欲死的羊犅聽狐狸按呢講隨跳落去啉水：喔！有影好啉甲！我啉飽矣，啊~咱欲按怎𬦰出去唅？
狐狸講：「今咱著愛合作：你徛直，前跤覆古井壁，我爬過你的尻脊骿，搭你的角跳出去，了後換我共你搝起起。」羊犅只好照做。
啥知狐狸一下跳出去隨就閬港。
詐騙一開始總是講盡好空來唌人上釣，掩崁家己惡毒的詭計。
--
Hosting provided by SoundOn

第十六篇鳥鼠佮四跤仔戀愛ˇ

後山人 — Fri, 01 Aug 2025 05:40:02 GMT

鳥鼠佮四跤仔戀愛
鳥鼠去予四跤仔愛著有夠僥倖。為著欲佮愛人仔做伙四跤仔將鳥鼠一跤佮家己的跤縛牢牢。去稻田散步食粟仔不止仔秋凊，當當來到水池仔邊，四跤跳落去泅水，歡喜甲kap kap叫。悲慘的鳥鼠食規腹肚水，歸尾煞淹淹死。
膨肚的鳥鼠浮起來水面去予枵燥燥的鴟鴞㨑起來，鳥鼠佮四跤猶縛做伙，一空掠雙隻，鴟鴞中晝頓有通加菜，真好空。
愛著較慘死，至少是家己選的，甘願；hông愛著閣剝袂離就死甲真悽慘，恐怖。
--
Hosting provided by SoundOn

第十五篇老獵狗ˇ

後山人 — Fri, 01 Aug 2025 05:37:44 GMT

老獵狗
獵狗自細隻仔就hông掠來教：顧厝練習擒khîm動物的功夫。主人準準準調(tiau) 銃，無論若遠若懸，無論獵物若歹若重獵狗攏會咬轉來交主人，樹林內底所有飛天鑽地的野獸在in追捕，拍獵--的真疼惜獵狗。
幾年後，老獵狗拄著一隻山豬仝款勇敢傱去咬豬耳，毋過牙落喙卯咬袂牢，山豬一下就旋去。
主人倚來氣刜刜：遐大隻的山豬予你拍生驚走走去，實在有夠無彩，你！生雞卵的無啦，莫閣來矣。
老獵狗真凊心，過去的功勞苦勞親像船過水無痕。
--
Hosting provided by SoundOn

第十四篇烏鴉啉水

後山人 — Thu, 31 Jul 2025 04:56:43 GMT

烏鴉啉水
一隻烏鴉喙焦喉渴，雄雄發現塗跤一支矸仔，內底有一寡水，哪知喙管短拼命探嘛啖袂著一滴水，看有食無干焦癮。
伊真毋甘願想來想去，有辦法囉！用喙夾一粒一粒的石頭擲落去矸仔底，水一點一點升懸到喙口，水總算予啉落喉。
死賴字運䆀抑是怨嘆父母無予家己好生成攏是無彩時間，欲解決問題需要想辦法觀察環境，靠家己的本等，一擺閣一擺增加能力，人生過得才會自在，才會自信。
--
Hosting provided by SoundOn

第十三篇狗蟻佮蟋蟀仔

後山人 — Thu, 31 Jul 2025 03:01:03 GMT

狗蟻佮蟋蟀仔
狗蟻無論透風落雨霜雪抑是艷日規工骨力咧作穡。
蟋蟀仔一早起到暗透日閒仙仙干焦會曉唱歌抐曲。
狗蟻總是替蟋蟀仔咧煩惱：恁好天就積雨來糧呢！哪攏無咧拍算，了然！
蟋蟀仔常在苦勸狗蟻：友的，恁根本就袂曉過生活，知做毋知享受，枉然啦！
古早時代上煩惱食袂飽，逐家攏親像狗蟻拚無停棄嫌蟋蟀仔貧惰。
現代社會有迷眾甘願腹肚縖咧開大錢看明星演唱會。
毋偌工課的形式無仝，歇睏嘛變做生活上大的動力。
--
Hosting provided by SoundOn

第十二篇伊索新解驢仔揹鹽

後山人 — Sat, 26 Jul 2025 11:56:01 GMT

驢仔揹鹽
主人靠驢仔戇仔載貨趁運金，戇仔逐工揹貨、行路、過溪閣行到市場。有一擺揹鹽過溪，跤滑一下規个跋落水底，主人趕緊共鬥ián起來，戇仔感覺貨變輕，真歡喜。有一遍伊載貨行到溪邊想著貧惰步，刁故意跋落去溪底，主人真緊張趕緊欲將貨敨開，毋過這擺載的是棉仔，欶水了後重橫橫，索仔重拖愈挽愈絚，主人搝無法，無奈何目睭金金看戇仔駐死。過去成功的經驗有可能是未來上大的危機。
--
Hosting provided by SoundOn

第十一篇伊索新解兔佮龜走鏢

後山人 — Sat, 26 Jul 2025 11:47:01 GMT

兔佮龜走鏢
兔招龜走鏢，第一擺靠勢家己𠢕走穩贏的，結果佇樹仔跤睏精神人龜已經爬到位提冠軍。第二擺兔毋敢閣激放放，一睏頭就走甲透，提著頭名,面子討轉來矣。第三擺，龜主意尾站就設佇溪的對岸。兔一目𥍉就走到溪仔邊煞袂曉泅水，目睭金金看龜泅去到對岸，所致輸輸去。人生毋是干焦一擺輸贏，一定愛拍拚增加家己的本等，發揮家己的優勢，閣較重要的是揣對手互相刺激鼓勵。
--
Hosting provided by SoundOn

第十篇伊索新解狼來矣

後山人 — Sat, 26 Jul 2025 11:25:19 GMT

狼來矣
顧羊囡仔逐工趕羊群去庄仔外的山坡地，羊仔隨隻隨隻向頭咧食草，伊無聊甲有賰就向庄仔內大聲喝：狼來矣！狼來矣！狼來矣！庄仔內的人工課放落兇兇狂狂傱來欲趕野狼，伊煞笑甲攬腹肚，耍了有紲閣創治幾若擺。有一擺，一陣野狼走來食羊仔. 顧羊囡仔拚性命大聲喝救命, 無人欲插伊，落尾，伊的羊仔賰無半隻。將心比心互相鬥相共是人佮人之間上蓋珍貴的情份，若是失去信任欲按怎揣轉來咧？
--
Hosting provided by SoundOn

第九篇放開才提會著

後山人 — Thu, 14 Sep 2023 15:56:50 GMT

放開才提會著
有一个囡仔伸手入去罐仔內搣糖仔，搦真大搣，規手底飽飽飽，煞伸袂出罐仔的喙口。
囡仔出力欲共手挽出來，毋過，捏糖仔的拳頭母仙挽嘛挽袂出來，囡仔緊張甲嘛嘛吼，手鑢甲紅記記，猶原是搦牢牢毋放開。就按呢舞規半點鐘。一直到𪜶阿母叫伊手放開，沓沓仔提。伊才甘願。有時貪心毋擔輸贏是加了時間，有時慢慢仔來顛倒較緊。
--
Hosting provided by SoundOn

第八篇目色好

後山人 — Wed, 13 Sep 2023 15:10:46 GMT

目色好
有一个誠老練的醫生對學生講：「欲做一个合格的醫生，要有兩種才調：第一、袂反腹，第二、目色愛好。」
伊伸一隻手指頭仔，搵落thái-ko水，開喙，吐舌吶nǎ吶nǎ咧。煞落請學生照做。
學生提出勇氣用指頭仔搵thái-ko水，噤氣含入喙。
老醫生講：「恭喜恁通過第一關，毋過，第二關目色挑戰失敗。」
恁敢有觀察著我用指指搵，舌吶nǎ的是中指。性命敢會使滾耍笑？
目色好才看會著做代誌的鋩角。快速培養成功的才調。
--
Hosting provided by SoundOn

第七篇按怎看待家己

後山人 — Tue, 12 Sep 2023 15:13:58 GMT

按怎看待家己
黃美廉是腦性麻痺的藝術博士、演講者、基督徒。腦性麻痺致使伊面歪喙uai-tshua̍h，講話含糊，行路無利便，毋過，伊的拍拚佮話語鼓舞濟濟人。
伊講：我總是看著上帝予我的恩賜—我真古錐，我有一雙長佮媠的跤，我有阿爸阿母佮上帝的疼，我會曉畫圖、寫稿，我猶有一隻貓作伴，閣有真濟真濟。
毋免欣羨別人，嘛無需要佮別人比並。珍惜是上大的幸福。
--
Hosting provided by SoundOn

第六篇天堂佮地獄的差別

後山人 — Tue, 12 Sep 2023 15:10:29 GMT

佇地獄：
大塊桌仔頂面是山珍海味，每一个人提一雙五呎長的箸，逐个人相爭夾菜，趕緊欲窒入家己的喙空，長躼躼的箸按怎斡都無法度就喙，逐家饞食𤲍來挵去，看有食無，風火著，面腔愈來愈歹。
換徙來去天堂看覓咧：
平平是規桌山珍海味，仝款是長躼so3的箸，菜夾予對面的人食，互相鬥相共，互相感謝，逐家歡喜食甲飽。
欲生活佇天堂抑是地獄應該是咱家己的選擇。
--
Hosting provided by SoundOn

第五篇成功是siáng的？

後山人 — Mon, 11 Sep 2023 13:41:03 GMT

泰雅族傳說樹林內，鳥類咧相拚：看siánn有才調將石壁頂上大掔的石頭踢落來。
thī-kes那走那想—家己頇顢飛，萬不一摔死，加衰的，隨放棄。bā-hio̍h真自信，連鞭翼股大力撇，連鞭用跤jiáu拼勢蹔。大石頭嘛是袂振袂動。青苔仔毋死心閣跳起起石頭頂，竟然一下就踢落石頭。泰雅族祖先認為青苔仔一定有神力佮智慧，所以就將伊的叫聲，飛的狀況來pok-kuà。
得著成功的，往往毋是上gau5的人，是堅持到底的人。
--
Hosting provided by SoundOn

第四篇若是蜂消失去

後山人 — Mon, 11 Sep 2023 13:26:51 GMT

蜂對人類的貢獻真大，有1/3的食物需愛蜂弄花授粉。
若是世界上無蜂，就愛靠人工弄花，菜蔬佮果子就會比金仔較稀罕。
為啥物蜂會有消失的危機咧？因為農藥的使用，環境的迫害強強欲害蜂絕種。
狗死，狗蝨也就無命；有科學家預測，若是蜂絕種，人類大概四年了後嘛會消失去。
友善環境是予家己活路；花繼續開，蜂自由飛，人類才有通安居樂業。
--
Hosting provided by SoundOn

第三篇拍無去的勇氣

後山人 — Thu, 07 Sep 2023 14:01:10 GMT

世界上gau5跳懸的是啥生物？答案是虼蚤ka-tsáu，一隻ka-tsáu會當跳家己身軀長的400倍懸。差不多是百外公分。
科學家提一个玻璃蓋蓋佇盒仔頭殼頂30公分的所在，見擺ka-tsáu跳懸起就挵著壁。
一擺過一擺，伊毋敢閣大力跳。
無偌久，將玻璃蓋提走，隨在伊欲跳偌懸，嘛袂閣挵著。
ka-tsáu本等原在，毋過，伊從此失去勇氣，甚至甘願選擇用行的較安全。
限制是暫時的，勇氣若拍毋去就真僫走揣。
--
Hosting provided by SoundOn

第二篇恬恬拍拚的四跤仔

後山人 — Wed, 06 Sep 2023 12:30:00 GMT

有一陣四跤仔咧比賽；看啥會當對幾偌尺懸的古井跳出來。真濟看鬧熱的hì- hè叫：加了工的，都毋捌有四跤仔跳遮爾懸，摔死較有影。聽煞真濟四跤仔就放棄囉！
獨獨孤一隻猶拼勢咧跳，跳起起，跋落來，閣跳起起，閣跋落來，伊歇一下，跳一下，有影愈跳愈懸，落尾正經去予跳出古井外！
逐家真好玄倚來問，伊搖頭講家己耳仔聽無。
原來，伊聽無著別人luí志的話，家己恬恬仔拍拚。才有通得著成功。
--
Hosting provided by SoundOn

第一篇受氣的蛇

後山人 — Tue, 05 Sep 2023 12:32:55 GMT

有一工，一尾枵soh soh的蛇爬入去做木的店內揣食的。
一無張持，尾溜去hue5著塗跤的鋸仔。伊疼一下強欲死，真毋甘願，斡頭大喙開開將鋸仔咬落。
喙煞割甲規空流血。這聲猶閣較受氣，目睭雄kai3 kai3。轉身將鋸仔束絚，出力推落去。
結果，蛇將家己鋸死去。鋸仔無出聲，一屑仔就無 hinn2 hainn 著。
上大的危險毋是心內的敵人，是受氣失去理智的家己。
--
Hosting provided by SoundOn